قصة ولد الجيران مع بنت قصه حقيقيه...

في يوم من ايام ربي وانا في عز النووم والتشخير شويا و فجــأه .. يرن التلفوووون ..
... انا رفعت السماااعه اوقلت نعم_
.. الا _وهذاااك الصوووت اللي يررد الروووح .. صوووت بنت .. واخييييكم اذا سمع
صووت بنت توجعه بطنــه ويجيه اسهاااال ... وقااالت الووو
.. انااا معش عرررفت شن انقوووول انشلن كرعيا وصارلي كيف ماصار
ال ياااسر عرفاااااات .. ال ال ال ال لوووووو .. قااالت .. مين معااايا ..؟؟
قلت .. معاااك انااا .. (( بصرااحه جوااب يدل على ذكاائك ..!! ))
وهيا تضحك .. وانااا قلبي احسه مش طبيعي وااااالع
كأنا دبابه ومرت من عند الكبد والبنكريااااس
صارللني انوااع الارررتباك.. وقاالت لي .. سوسو موجوووده ..؟؟ قلت لهااا ..
ما ينفعش حـوحـو ..؟؟ قاالت حـوحـو من ..؟؟ .. قلت ..
هذا اسـم دلع الحماار اللي هـو اناااا .
. !! وضحكت للمرره الثاانيه على التواالي .. وقاالت .. حي
شكلي غلطاانه .. معليش آسفــه ... قلتلهااا .. لاعاادي.. لاشكــررر على واااجب .
. (( دايم نسمع في هالكلمه .. وجت الفرصه اني انقولها ..!! )) ..
وسكرت السماااعه ... :
تصدقووو.. مش عارف شن صاار فيا .. حسيت بشعقريــره في جسمــي ..
وافرازااات الخشـم عندي زااادت .. وانحس في روووحي نبي نبطــح عل سررررير
ونكتب قصيـده فصحه .. زعمك هـذا هــو الحـب اللي يقولوووووو عليه..
(( ينعن بو الحب اللي تعرررفه يالضفــدع ..!! بس انااا منيش متعووود على
البنااااات .. لان ما شاالله حوشناااا فيـه خـمـسـطـاشـر راااااجل اللي هم انااا
وخوووتي وبااااتي وامــي .. (( الله يكون في عون باتك وامك انت الكبير في
خوتك عليه العوض ومنه العوض: ))
المهم .. يعني اناا وخوتي مااشفنش بنت بكل.. وهذا اللي سببلناا عقــده
تسمــى العقـده الفيسلووجيـه .. (( من وين جت هذي ..!! ))
المهــم .. انـا قررت انــي انتعرررف على بناااات ... بس فيــه مشكلــه وحـــده
اللي هـي انـي ماااعنــديش اسلووووب بكل ...(( يعنـي جت عل ااسلوووب ..
ينعن شكلك انت عندك الف مشكلـه مش مشكله بس .. واهمهااا مشكلــة
وجهـــك اللي رايح كيف لووحة انتبه اماامك نقـطة تفتيـش ..!! )) المهم انا
مااالقيتش قداامي الاااا وااحد مـن الشباااب اسمه المدرق.. معروووف
ان البنااات ما يتحملوش_فيه_ شي.. المهم لقـطت مفتاااح سياره باتي فل قايله ودغري
شور حوشهم .. مشيت للمدرق.. وحكيتله على وضعـي وان اميتــي في
الحيااة انتعررف على بنـت قبل ما انموووت .. (( خزززي يالشااايب ..!! )::
فقاااللي .. االموضوووع بسيط .. اذا تبي البنـت تحبــك حسـسـهاااا انهااا
احسـن وحــده فـي العااالم ... قلت لـه ..كيف يعني..
... يعنـي انقوووللهااا انتـي احســن مـن مارادووونا ...!! وهو
يرفسنـي بكراعه فـي بطنــي .. وقاالي .. انت ثووووور ..شن دخل
مارادووونا يالغبـي .. !! اناا قــصدي انـك تحسسهاا بانوثتهاااا وان ماافيش
بنت غيرهااا في العااالم .. قلـتلـه .. برررضو
ماافهمـتش .. يعني تبينـي نذبـح كل البناات ونخليهاا هياااا بس ...!!
ويمحطنــي بيــده علـى جبهتـــي ..... وقاالي ..
لا انت حمااار .. ومش حاتفهـم الا بالدرووس العمليــه ... ويطلــع نقاله ويــتصل .
. وقالي .. شووف اناا تواااا حن كلم وحــده..
. وتعلــم .. قلت لـه .. ماشي الحال ...
وكلم .. وقااال .. مرحبا حياااتي مرحبا عمـررري شنجوك ياروووحي ..
انااا لــؤي حبيبـك ومجنووونك .. (( .. ينعن شكله بعيد السو على لؤي منه.
. والله لو نشووف وجهـه في احســن الاحواال مانعطيــه غيـر اسم شبردق ..
قالك لـؤي ..!! )) .. : وبدايقوولهااا .. انحبــك وانمووت فيــك ..
اناا من غيرك كيف الحوش من غير منطقه ..كيف التليفووون من غير حراااره ..
كيف السوااق من غير سياااره .. اناا البنـزينا وانتــي الشراااره ..
انااا الشاارع وانتي الاناااره ..اناا الروماانسيـه وانتـي الاثاااره
اناا مبنى التجاااره العااالمي وانتـي الطياااره ... ((
قســم بالله تميت نبي نضبطه وانبووسه بعد سمعـت كلاااامه ..
حسيت بشعووور غريب .. ينعن شيطانه لوكان يكلم في ساس راهووو ذاااب ))
المهم .. كمل المكاالمـه .. والتفـت عليا .. وقاال لي .. توا دوورك ..
نعطيـك رقـم بنــت وكلمهااا .. وقوول لهاا نفــس كلاامي ...
قلـت لـه بكـل حشم ..ماشي الحال .. وهووو ايكلم بنــت ويعطينـــي
النقاااال عشن انكلمهااا ... وانااا مالحقتش انقوول الووووو .. ونسمع
صوووتهاا ضعت .. ونسيـت كل الكلاااام .. وقلت لهااا ..
بابا فيـــن ..!! ومااا حسـيت الاااا بهضاك الكف...
وقاال لي .. قـوووول نفس الكلاام اللي قلتـه انا ياثوووور ... وانااانقووول لهـااا
... مرحبااا بحيااتي مرحبااا برووحي مرحبا تعااالي .. وقالت .. باهي وبعــدين ... قلت لهااا .
. انااا من غيرك كيف الكيبووورد من غير فاااره .. كيف التقااطع من غير اشاااره ..
كيف الحمااار من غير حماااره ... كيف الشرموله من غير خياااره .. انااا
محترررف وانتـي نظااام الإعاااره ... انااا الولاااعه وانتـي السجاااره ...
انااا الطريق وانتـي االسياااره... انااا البشبوو وانتـي الخرااااره ...
اناااا طوووط طوووط طوووط طوووط ... سكرت الخـط في وجهــي ....
قاالي المدرك. كنك ؟؟ .. قلـت لـه .. شكله الخــط مشغوووول ...!!
(( ماايعررفش يصررف بكل ..!! )) ومااانندري الاا ولمدرك مطلــع لووحا فيها
مساامير او يهتكني بيهاا نيييين قلــت للعنــز ياخااالتي ...:
المهـم .. روحت للحوش ودمي يصب ومعبي وجهـي من كثر الضرب
اللـي جاااني مـن المدرق00
لدررجة ان اللي يشووفني ماا يعررفنيش.. كاني طالع من مسااابقـة ..
مـنو صااحب هــذه الصوووره .. اللي في المجلااات ...
خشيت الحوش بشووويش عشاان ميشووفنيش حــد ..
وركبت الداري وسكــرت الباااب ورقدت ... وفـي عــز النوووم ..
يرن التلفووون .. ونررفع السماااعه .. الا اوهـيا نفـس البنــت
اللي كلمتنـي من قبل .. قلـت .. نعــم .. قاالت .. سوسو موجوووده ..؟؟
قلـت لهـا .. اسمعي .. حوشنااا كلــه شبااب ((حديد ايحك في بعضه)) .. وماافيش حـد يبدا اسمـه
بل سين .. انا وخوتي كلناا اسمنااا مرراجع.. وماا فيش الا
خوويا الصغيــر عطيه هو اللي اسمــه راشد ونادوله عبدالعاطي....
(( كنا عادل امام..!! )) والبنــت تعزق الضحكــه .. وقاالت
ما شاالله دمـك خفيــف ... (هي تسحبني نسمط ماتندريش انه من جدي ))
وقلــت لهااا .. شكــرا .. (( عل ساس مؤدب ..!! ))
وسـألتنـي البنــت .. فيش ادير توااا ..؟؟ .. قلت لهاا .. والله كنـت رااقد
... قااالت .. ترقد في الليل انــتا ..!! .. قلت .. اينعم امتـــى نرقد ..؟؟
قااالت .. لاااا انااا نرررقد في النهااار ونسهرر في الليـل ... قلـت لهاا ..
من معايا البووومـه ؟..!! قاالت .. لااا بس الليل وقـت الروماانسيه ..
انت تعررف الروماانسيه ..؟؟ قلت لهااا .. لاوالله ماا نعررفش بناات
انااا ...!! ((اوكي يافاااهم ..!! ))
وسألتنـــي .. انت شن اسمــك ..؟؟ قلت لهـااا معيون قالت شنو شن معناااه ..
قلت لها .. هذا اسـم كلـب كاان عنــد جـدي ومات وسمااني بااتي عليـه لانـي نشبـهله
.... وسألتهااا .. وانتــي شن اسمــك .. قاالت ..تيدا.. قلت لهااا ..
اناا نبي نعررف اسمــك مس نوعك ...!! قاالت .. اسمي تهاني يدلعوني تيدا (( الجيش ولا استراد مش فاهم))..!!
(( هذيناا البنااات .. تسألهاا شن اسمـك .. تقول رهـف ولاا شووق ولا اريج.. بعدين تسمع خوها يعيطلهااا
يااا تعويضه ...عليك حشمه..!! )) درت فيها اسلوب وقلت لها اني حبيت وحده
بس انتهى هالحب .. لان اللي حبيتهااا خاانتني ... قالت لي .. من حبيـت ..
؟؟ قلت لهااا .. حبيـت عنـزه جيرااننا .. بس انهاا خاانتني مـع تيــس
مااالطي عشااان عيونه حمر ...!! المهم .. ان البنت قاالتلي .. اووكي
انكلمك بكررره لان ماما تعيطلي .. قلت مش مشكله..
وتطووورت العلاااقه .. وتمينااا نكلمو في بعــضنا كـل يووووم .. وانااا
انقلــب حااالي .. ولااحظوا هلــي انــي تغيــرت .. يعني نقعدوو
مقمعزين على الغـدا ولاا العـشاااا واناا مانكلش .. ساااارح ونتنهد ..
ومراات ننسى في صبعـي جوااا خشمــي
ولااحظوا هلــي انـي صررت مؤدب ونقراا وااجد .. واناا نقراا عشااان
نعررف كلاام جديد في الحـب .. تلقااني نقراا في كتـب الشعــر والحب
والطبـخ .. (( ماتستغربوش لان كتب الطبخ اتعلم منهاا كلاام حلو كيف
.. ياعسـل , ياحليـب , ياقشطـه , ياكريم كراامل ..!! ))
وبررضه صررت ادخـل كتــب ممنوووعه للبيـت ..كيف ..كتاااب .. سنـه اولى زواااج ...
بس المشكله ان الكتب راحت مني وتميت انعدي
للسبخه الي جنبنا ونقعـد انفكررر وانتـأمل ونعزق
فل الحيط الصغير وسط السبخه....(( عل ساس روماانسي .. كيف الي يقعدو عل بحر
ويعزقو فل حيط..!! ))
المهم .. انه في ليلـه من االليالي .. قاالت لي البنـت 00معيون..
وصـفلي شكلــك ..!! عليك قصه .. شن اتقوولها هذي توا ..
انقوولها اني قررررد .. نعتررف لهاا بالحقيقه المررره وانقووولهااا
اني ساس مفيش ملااامح ... اعترف لها اني شبيه حمدي كنايس(
بس قلت في نفسي .. خليني
انديير كيف كل الشباااب .. ونخرط
عليهااا يعني تلقـى الوااحد من الشبااب شيييين واذا شفتا في الشاارع
ماتعرفش هوا ماشي ولا جااي لان وجهـه ماالهش معااالم ..
.. يعني مفرووض يحـط لووحه على وجهـه
ويكتـب .. راهو هذااااا وجهـي .. عشن النااس مايلخبطووش بين وجهه
وزنقيرته .....وانـاا كيفكم وازفت اخرى (( لاعين لا جمه)).. اذا قاابلت حد يقعد سااعه
محتاار وين وجهي
وماا يعررفش الا اذا لقـا الوورقه .. لان فيا وررقه كيف
اللي فل فناويل والسراااويل عشن تعررف ورررى من قدااام ...
!! المهـــم .. انـا قلـت لهــااا .. اناا عيووني مثل عيوون عمر دياب..
وطولي كاظم الساهر.. وخشمـي
مايكل .. ..
المهم .. ان البنــت شكلهااا طاحت وتمت تشهق من الفررحه
.. وسألتهااا وانتي وصفيلي شكلـك .. .. قاالت ..
ما نقدرررش .. لماا تشوووفيني توا تعرف.. لان مااليش شبيـه ..
(( هياااا يابريتنــي ..!! )) .. وانااا فمي انفتح وتمن روايلي ينزلن
.. كاني كلـب شاف عظمه ... وقلت لهاا .. يعني
حنشوووفك ..؟؟ قااالت .. اكيــدا .. اناا بكررره ماشيه للقريه السياحيه (( بلا مزال يمشولهاا))
.. ونشوفك غادي .. قلت
لهاا .. القريه عائلات بس .. قاالت دبرر راسك ...
قلت اووكي بس كيف نعررفك ... قااالت بيناتنا
تليفون .. اذا وصلت كلمني واناا انقولك وين تلقاااني .. قلت لهااا
خلاااص ماشي الحال انتلاقو فل قريه ....

تكملة القصة بعد الردود

من طرف **The Divel** الثلاثاء مارس 09, 2010 11:46 am

صحيت ع القصة يامحمد

من طرف aboday2j الخميس مارس 11, 2010 11:00 pm

مشكور اخى الكريم بارك الله فيك موضوع كبير

قصة ولد الجيران مع بنت قصه حقيقيه...

قصة ولد الجيران مع بنت قصه حقيقيه...

رد: قصة ولد الجيران مع بنت قصه حقيقيه...

رد: قصة ولد الجيران مع بنت قصه حقيقيه...